LISTSERV mailing list manager LISTSERV 15.5

Help for GAELG Archives


GAELG Archives

GAELG Archives


View:

Next Message | Previous Message
Next in Topic | Previous in Topic
Next by Same Author | Previous by Same Author
Chronologically | Most Recent First
Proportional Font | Monospaced Font

Options:

Join or Leave GAELG
Reply | Post New Message
Search Archives


Subject: Naightyn Radio Vannin
From: Brian Stowell <[log in to unmask]>
Reply-To:Manx Gaelic Language Forum <[log in to unmask]>
Date:Wed, 16 Jun 2010 09:38:03 +0100
Content-Type:text/plain
Parts/Attachments:
Parts/Attachments

text/plain (87 lines)


Naightyn Radio Vannin				16.06.10

Tynwald asked to approve spending of more than £10.5 million -  
Tinvaal shirrit er dy choardail rish ceau ny shlee na £10.5 millioon
Y laa jea, v'eh shirrit er Tinvaal dy choardail rish ceau beggan ny  
shlee na £10.5 millioon son yn obbyr aa-lhiasaghey ec Corneil Janet  
ec Balley Chashtal.
Chammah as shen, va hoght cheead, tree feed as daa-yeig meeilley punt  
shirrit er y whaiyl son yn obbyr jannoo ass y noa ec Bradda, as  
shiaght cheead meeilley punt y fo-hroggalys lectragh ec Thie-lheihys  
Noble y chur seose gys daayt.
Va kiare as feed feysht ayn jea son freggyrtyn loayrit, as hoght  
feyshtyn son freggyrtyn screeut.
Shagh-votal sy fo-reihys ayns Doolish Hiar er y gherrid, va shen y  
chooish jeh tree feyshtyn veih Peter Karran, Oltey jeh'n Chiare as  
Feed son Kione Droghad, as veih Chris Robertshaw, hie er reih myr  
Oltey jeh'n Chiare as Feed son Doolish Hiar er y gherrid.
Y costys jeh cur aeragyn-creeley noa seose ec Sniaul son Radio  
Vannin, as yn oyr nagh jagh y moggyl-creeley er preevaadjaghey, hie  
shen er resooney. Mastey cooishyn elley va'n tuarastyl mychione  
cooish Spadoni, as Co-chruinnaght Rio.

Swearing-in of new MHK - Ghow OKF noa ny looghyn
Ta fer noa ayns Tinvaal veih'n laa jea (Jemayrt).
Ghow Chris Robertshaw e hoiag ayns y whaiyl son y chied cheayrt  
neayr's hooar eh yn varriaght sy fo-reihys ayns Doolish Hiar ec  
jerrey'n vee shoh chaie.
Ghow eh looghyn ayns jesh-chliaghtey er lheh sy Chiare as Feed, as eh  
cur yn ennym echey hug adsyn hie er cur ayns Lioaryn Looghyn Vannin  
neayr's y vlein queig cheead jeig as kiare feed.
Ghow yn jesh-chliaghtey ynnyd ec feed minnid lurg nuy moghrey jea,  
beggan ny shlee na un oor roish my haggil Tinvaal cooidjagh.
Kionfenish Olteynyn elley, ghow Mnr Robertshaw daa loo roish y Chied  
Vriw.
Sy chied loo, vreear eh ammys rish Benrein Hostyn. Sy nah loo, yiall  
eh dy gooilleenagh eh ny currymyn echey myr Oltey jeh'n Chiare as  
Feed gyn aggle, gyn foayr, as nagh jinnagh eh olk rish peiagh erbee.

'Prop wash' and water jets blamed for pier hole - Loght er maistrey- 
seiyeyder as skiootyn-ushtey
Roish foddey, gowee ad toshiaght dy charraghey towl mooar fo Peer  
Victoria ayns Doolish. S'cosoylagh dy bee yn obbyr costallagh.
Va folmid feddynit fo'n troggal-cloaie foawragh, tra va thummeyderyn  
y Rheynn Fo-hroggalys jannoo scrutaghtyn skedjallit ayns kegeesh y TT.
T'eh smooinit dy row yn vaarney jeant ec maistrey-seiyeyder veih Ben  
my Chree, as veih skiootyn-ushtey siyn bieau yn Phaggad Bree.
Stiureyder ny Puirt, y Captan Mike Brew, t'eh gra dy nee kiartey  
mooar t'ayn, agh hed eh er jannoo 'Áheusthie'.

Adverts in countryside - call for 'common sense' - Soilsheenyn er y  
Áheer - eam son 'keeall chadjin'
Ta Oltey jeh'n Chiare as Feed goaill rish dy row eear-rheynn jeh  
reiltys Vannin smaghtoil, foddee, tra lhiet ee soilsheenyn co-phobble  
ayns ynnydyn theayagh.
She Juan Kodhere, Oltey jeh'n Chiare as Feed son Rushen, ny  
chaairliagh jeh Bing Reiht jeh Tinvaal, va currit er bun dy  
scrutaghey soilsheeney er y Áheer.
Roish my dug eh ny va feddynit ec e ving roish Tinvaal jea, doooyrt  
eh dy vel feme er aghtey lesh keeall chadjin.

Appeal dismissed in rock musician's death case - Aghin son  
aachlashtyn ceaut magh ayns cooish vaase chiaulleyder-rock
Y nah eab dy hual dooinney son marroo kiaulleyder-rock liorish imman  
dy gaueagh, t'eh er vailleil.
Y fo-rheynn-aachlashtyn jeh'n Ard-whaiyl, t'ad gra nagh bee Andrew  
Leslie Hamilton sy whaiyl reesht, bentyn da drogh haghyrt-raad,  
aynsyn hie er marroo yn eear-chloieder mair-chlaare marish Echo and  
the Bunnymen, James 'Jake' Drake-Brockman.
Y recortysser tree-jeig as daeed blein dy eash veih Bristol, v'eh  
ayns co-vuilley noi carbyd elley ec Orrisdale er y raad eddyr Skylley  
Maayl as Balley ny Loghey Mee Luanistyn shoh chaie. Ayns y toshiaght  
va cassid jeant noi dy nee eshyn va oyr y vaaish kyndagh rish imman  
gaueagh.
Agh tra haink eh roish y whaiyl Toshaght Arree, dooyrt y lhiass ard- 
vaylee nagh row feanish dy liooar ayn dy gholl er oi. Ghow eh rish  
aghin Hamilton dy row eh oolee as eh gimman dy neuchiarailagh -  
cassid sloo trome-chooishagh.
Va final nuy cheead punt currit er Hamilton, v'eh lhiettit dy imman  
son nuy mee, as sarey currit da dy eeck costyssyn jeh lieh-cheead punt.
Agh ren shamyryn y Turneyr Theayagh aghin noi'n vriwnys shen, as ad  
briaght row yn lhiass ard-vaylee kiart dy gholl er oi lesh y chassid  
sloo trome-chooishagh.
Ayns e vriwnys, dooyrt y Briw Doyle dy beagh eh olk dy gholl er lesh  
cooish jeh imman dy gaueagh, er y fa dy choard y shual y lhiassagh  
shen y chur rish Hamilton.
As eh ceau magh yn aghin son aachlashtyn, t'eh gra dy beagh eh  
neuchairagh as tranlaasagh dy gholl er lesh lheid y chooish.

Back to: Top of Message | Previous Page | Main GAELG Page

Permalink



LISTSERV.HEANET.IE

CataList Email List Search Powered by the LISTSERV Email List Manager